Tre milionë britanikë viktima të mashtrimeve

Tre milionë britanikë viktima të mashtrimeve





Tre milionë njerëz në vit janë viktima të mashtrimeve nëpërmes e-mailit, letrave dhe telefonit derisa mashtruesit nga kjo fitojnë 3.5 miliardë funte (rreth 4.5 miliardë euro) – ka treguar raporti më i ri i Zyrës për tregti të ndershme në Britani të Madhe.Disa nga mashtrimet bazohen në fitimet e rrejshme të lotarive, por që të merren paratë nevojitet të paguhen edhe shpenzimet administrative. Të tjerat përfshijnë punën nga shtëpia pa kualifikime dhe pagesën e anëtarësimit për organizatat joekzistuese.

“Një numër i madh i e-mailave, të cilët i ka zbuluar fushata jonë Scamnesty, qëllimi i së cilës ka qenë të inkurajojmë njerëzit të lajmërohen në rast se janë mashtruar, tregojnë se me të vërtetë ekzistojnë mashtrime për secilin'', ka sqaruar Mike Haley, drejtor i njësisë për mbrojtjen e konsumatorëve në Zyrën për tregti të ndershme në Britani të Madhe.

Nga kjo zyre këshillojnë konsumatorët që të mendojnë mirë dhe me kujdes para se t’u dërgojë para njerëzve apo kompanive të cilat nuk i njohin, dhe porosisin: ''Nëse diçka ju tingëllon si tepër e mirë për të qenë e vërtetë atëherë sigurisht edhe nuk është e vërtetë''.