Laptop gjigant për entuziastët e fotografive

Laptop gjigant për entuziastët e fotografive





Kur janë paraqitur për herë të parë laptopët me diagonale të ekranit prej 17 inçësh, na është dukur se ky ishte kufiri më i lartë i madhësisë së tyre. Mirëpo kohëve të fundit janë çdo ditë e më të zakonshëm laptopët edhe më të mëdhenj, e një prej atyre interesant që është paraqitur rishtazi është edhe Sony i ri Vaio type A.Sony Vaio type A është laptop me ekran të diagonales 18.4 inçësh, i dedikuar për entuziastët dhe profesionistët të cilët merren me përpunimin e fotografive dhe videove.

Bëhet fjalë për një makinë të fortë: pos ekranit me rezolucion HD dhe (1920x1080) me ndriçim të pasmë LED, nën mbulesën e tij gjendet procesori Core 2 Duo T9400 i cili punon me takt prej 2.53GHz, Blu-ray, kartela grafike GeForce 9600M GT, katër GB të memories punuese dhe dy disqe të forta prej 250 gigabajtësh.

Nga hyrjet dhe daljet e tij vlen të theksohet qasja eSATA, dalja HDMI, tre USB dhe qasja Firewire, të cilën entuziastët e video materialeve do ta dinë ta çmojnë. Në të gjendet edhe lexuesi i shpejt i kartelave CF dhe WiFi, derisa me laptopin vjen një paketë e aplikacione të Adobe për përpunimin e fotografive dhe videove.

Ajo çfarë në ka fascinuar në veçanti është tasti jashtëzakonisht i madh “enter” të cilin thjesht nuk mund ta huqim. Duke marrë parasysh se shumica e laptopëve sot vijnë me ‘enter’ të zvogëluar, ky veprim i Sonyt do tu pëlqejë shumë shfrytëzuesve.

Të gjithë këto kanë arritur të përmblidhen në 3.9 kilogramë, mirëpo duhet ta dini se bateria nuk do të arrijë ta mbajë më gjatë se dy orë, nëse nuk blini ndonjë shtesë. Çmimi? Në Japoni, ‘pak pare’; gjithsej 3.000 dollarë amerikane. Tek ne? Kush e di sa.

www.sony.com