Zbulohet skema e vjedhjes të bankomateve

Kreu i bandës së piratëve të bankomateve, i arrestuar gjatë operacionit “Matrix”, pranon të rrëfejë para hetuesve të çështjes mekanizmin e grabitjes së dy milionë eurove me anën e kartave të kreditit në të gjithë Shqipërinë.
Endrit Gjergjani, i cilësuar si truri i grupit, gjatë marrjes në pyetje ka deklaruar se është ndihmuar për ushtrimin e aktivitetit të paligjshëm nga disa shtetas nga Kosova.

Ai tha se në fillim të vitit 2008, është njohur me dy shtetas nga Kosova, të cilët arrinin të klononin kartat e kreditit dhe të kryenin vjedhje në bankomate.

Sipas tij, kosovarët, që cilësoheshin edhe si mjeshtër kompjuterikë në vendlindje, arritën të vidhnin mijëra euro në bankomatet e vendosura në Shqipëri, si dhe arritën të kryenin vjedhje edhe në qendrat tregtare.

“Ata na mësuan të gjithë mekanizmin e vjedhjes. Prej disa muajsh kemi blerë pajisjet dhe nisëm të prodhonim kartat e kreditit të falsifikuara pa ndihmën e tyre”, mësohet se ka dëshmuar kreu i organizatës “Matrix” gjatë marrjes në pyetje nga prokurorët e çështjes, para nisjes së dosjes në gjykatë.

Rrëfimi i Gjergjanit

Kreu i grupit “Matrix” ka pranuar të rrëfejë grabitjen më të sofistikuar të mijëvjeçarit të ri në Shqipëri, duke pranuar të gjithë fajin.

Ai ka shfaqur pendesë para hetuesve të çështjes dhe ka deklaruar se vjedhjet kryheshin vetëm për qejf, pasi nuk ka ndikuar në rritjen e nivelit të jetesës.

“Ishim një grup të rinjsh, të pasionuar pas internetit. Nuk kishim si qëllim të fitonim shuma të mëdha, por sa për të kaluar ndonjë fundjavë të bukur në vendet fqinje”, filloi dëshminë Gjergjani.

Sipas tij, aktiviteti i tyre filloi tetë muaj më parë. Në atë periudhë, shpjegon, janë njohur me një grup kosovar që kryente vjedhje në bankomate. Arritën të “punonin” me ta për gati 6 muaj, kohë e cila u është dashur të përfitonin “zanatin”.

“Prej tetë muajsh jemi njohur me një grup kosovar të vjedhjes së bankomateve. Nga qëndrimi me ta kemi arritur të mësojmë mekanizmin e marrjes së kodeve PIN dhe PUK, që të mund të futeshim në sistemin bankar”, tregon Gjergjani.

Ai saktëson se kosovarët, tashmë persona nën hetim, ishin mjeshtër të marrjes dhe përpunimit të kartave të klonuara. “Ata arrinin të merrnin nëpërmjet internetit të gjitha informacionet për të klonuar një kartë. Më pas arrinin të futeshin në sistem, duke boshatisur të gjithë depozitën bankare”, deklaron nga qelia.

Bashkëpunëtorët e huaj

Prokuroria e Tiranës tha dje se ka kopsitur dosjen, ku filmimet dhe përgjimet i ka bashkangjitur edhe me dëshmitë e të arrestuarve.

Hetuesit thanë se pjesa më e madhe e adoleshentëve janë penduar për krimin që kanë bërë, duke deklaruar se gjithçka u është dukur si lojë në fillim. Burimet nga Prokuroria e Tiranës thanë dje se të arrestuarit gjatë operacionit policor “Matrix” janë pyetur për marrjen e informacioneve dhe mekanizmit të klonimit të kartave.

Sipas tyre, krerët e organizatës ishin lidhur nëpërmjet internetit me një grup hakersash nga Rusia. “Informacionet që arritëm të klononim kartat e kreditit i kemi marrë nga hakersat rusë.

Ata arrinin të gjenin kode dhe numra llogarie nga persona që kryenin blerje nëpërmjet internetit. Këto numra dhe kode i nxirrnin në internet. Organizatorët e “Matrix” i blinin këto të dhëna kundrejt një shume të caktuar”, tregojnë të arrestuarit. Nisur nga të dhënat e mësipërme, hetuesit kanë ngritur të gjithë mekanizmin e vjedhjes.


Klonimi i kartave

Prokuroria thotë se pas marrjes së kodeve PIN, që është personal, dhe kodit PUK, që ka llogari përkatëse, ndërhyhet në sistem, duke transferuar nga llogaria të gjithë sasinë e lekëve. Piratët arrinin të blinin një kartë të bardhë.

Nëpërmjet një pajisjeje që është në formën e printerit, kryhet hedhja e të dhënave në këto karta. Më pas, te shiriti magnetik që kanë, hidhet në printer i gjithë kodi.

Në bazë të këtyre, duke formuar dy kodet, PIN dhe PUK, karta futet në bankomat dhe veprohet njësoj sikur të ishte personi që ka të njëjtën llogari bankare. Prokuroria deklaron se të arrestuarit në Shqipëri kanë kryer transferime valute drejt Rusisë në këmbim të marrjes prej andej të kodeve dhe numrit të llogarisë.

“Kemi zbuluar se të arrestuarit e operacionit ‘Matrix’ kanë arritur të transferojnë drejt Rusisë një sasi të konsiderueshme valute. Nga dëshmitë e personave të arrestuar kemi zbuluar se paratë dërgoheshin në Rusi me qëllim marrjen e të dhënave personale të disa individëve që kryenin blerje me anën e internetit”, thanë burimet nga Prokuroria e Tiranës.

burim i lajmit: TopChannel.tv